महोत्तरी – नेकपा माओवादी केन्द्र बर्दिबासले आसन्न स्थानीय निर्वाचनको लागि आफ्नो घोषणापत्र सार्वजनिक गरेको छ ।

बिहीबार एक कार्यक्रम गरी स्थानीय तहमा निर्वाचित भएपछि पाँच वर्षसम्म गर्ने काम र पाँच वर्षपछिका आधारहरू घोषणापत्रका माध्यमबाट सार्वजनिक गरिएको हो ।

घोषणापत्रमा युवा स्वरोजगारलाई मुख्य प्राथमिकता दिइएको छ । वार्षिक पाँच सयभन्दा बढी युवाहरूलाई नगरभित्रै स्वरोजगार सिर्जना गर्ने घोषणापत्रमा उल्लेख गरिएको छ ।

विकासका पूर्वाधारमा परिवर्तन गर्ने बताउँदै उक्त घोषणापत्रमा धुलाम्य सडकबाट मुक्त बनाई वार्षिक १५ किलोमिटर सडकलाई पक्की बनाउने नीति लिइएको छ । सबै प्रकारका सडक कम्तीमा चार मिटरको हुनुपर्ने नियम लागू गर्नेदेखि फलाइ ओभर बृज र अन्डरपास निर्माण गर्ने नीति लिइएको छ ।

नगरवासीहरूलाई निःशुल्क उपचारको लागि स्वास्थ्य बिमा परियोजनालाई गतिशील बनाउने, सुविधा सम्पन्न सर्पदंस उपचार केन्द्र, एक वडा एक योग ध्यान केन्द्र, विपन्न र दीर्घ रोगीहरूको लागि नगर स्वास्थ्य कोष स्थापना गरी निःशुल्क उपचारको व्यवस्था गरिने, बर्दिबासलाई सुविधा सम्पन्न, आधुनिक उपकरणसहित सय शय्याको अस्पताल स्तरोन्नति गरिने बताइएको छ ।

आधिकारिक स्वामित्वको आधारमा तुरुन्त लालपुर्जा वितरण गर्ने, किसान परिचयपत्र बनाउने, आधुनिक गोठ, खोर तथा पशुपालनमा २५ प्रतिशत अनुदानको व्यवस्था गरिने माओवादी केन्द्रले नीति बनाएको छ ।