काठमाडौं– उत्तर कोरियाली सर्वोच्च नेता किम जोङ उनकी बहिनी किम यो जोङले दक्षिण कोरियामाथि आणविक हतियारको प्रयोग गर्ने चेतावनी दिएकी छिन् ।

उत्तर कोरियाको सरकार सञ्चालित समाचार संस्था केसीएनएले जनाएअनुसार किम यो जोङले दक्षिण कोरियाले युद्ध भड्काएको खण्डमा आणविक हतियारको प्रयोग गर्ने चेतावनी दिएकी हुन् ।

यसअघि दक्षिण कोरियाली रक्षामन्त्री सुह वुकले दक्षिण कोरियासँग उत्तरका सैनिक निशानामा सटिक प्रहार गर्ने क्षमता रहेको टिप्पणी गरेका थिए ।

सोही टिप्पणीको जवाफमा किमले यस्तो चेतावनी दिएकी हुन् । उनले सुहको टिप्पणीलाई ‘काल्पनिक दिवास्वप्न’ र ‘पागलको अनियन्त्रित आवेग’ संज्ञा समेत दिइन् ।

उनले उत्तर कोरियाले चाहेको खण्डमा दक्षिण कोरियाको परम्परागत सैनिक बललाई आणविक हतियारले समाप्त पारिदिने समेत चेतावनी दिइन् । आफ्नो मुलुकले कोरियाली प्रायद्वीपमा अर्को युद्ध नचाहेको भन्दै यदी दक्षिणले आक्रमण गरेको खण्डमा दक्षिण कोरियाली सेनालाई ‘पूर्ण रुपमा ध्वस्त एवम् भग्नावशेष’ मा परिणत गरिदिने उनको चेतावनी छ ।