काठमाडौँ– नेपाल विद्युत् प्राधिकरणका कार्यकारी निर्देशक कुलमान घिसिङले दुई वर्षपछि बिजुली खरिद गर्नुपर्ने अवस्थाको अन्त्य हुने दाबी गरेका छन् ।

शनिबार नेपाल इन्जिनियर्स एसोसियसनले चितवनमा गरेको कार्यक्रममा कार्यकारी निर्देशक घिसिङले दुई वर्षपछि भारतबाट बिजुली खरिद गर्ने अवस्थाको अन्त्य हुने बताएका हुन् ।

नेपालमा पर्याप्त विद्युत् उत्पादन हुने र सुक्खायाममा पनि आयात गर्नु नपर्ने उनको दाबी छ ।

घिसिङले दुई वर्षमा करिब दुई हजार मेगावाट बिजुली उत्पादन बढ्ने भन्दै देशभित्रको मागलाई सहजै पूरा गर्ने पनि बताए । अझ् वर्षात्का बेला मागभन्दा ६० प्रतिशत बढी बिजुली उत्पादन हुने पनि उनले बताए ।

अतिरिक्त उत्पादन भारत सरकार खरिद गर्न सहमत भएको पनि घिसिङले जानकारी दिए ।

हाल भारतबाट करिब ४ सय मेगावाट बिजुली आयात हुने गरेको छ ।