न्युयोर्क – अमेरिकी सभामुख न्यान्सी पेलोसीको ताइवान भ्रमणपछि चीनले ताइवान वरपरका समुद्रहरूमा सैन्य अभ्यास थालेको छ।

ताइवानको छोटो र विवादास्पद भ्रमणपछि चीनले प्रतिक्रिया स्वरूप पाँच दिनको ‘आवश्यक र उचित’ सैन्य अभ्यासको घोषणा गरेको छ ।

ताइवानले २७ चिनियाँ युद्धक विमानहरू पहिले नै आफ्नो वायु रक्षा क्षेत्रमा प्रवेश गरिसकेको जनाएको छ । अज्ञात विमान, सम्भवतः ड्रोन, बाहिरी किनमेन टापुहरूमा उडेको ताइवानको रक्षा मन्त्रालयलाई उद्धृत गर्दै रोयटर्सले जनाएको थियो।

अमेरिकाले सभामुख पेलोसीको भ्रमण लगत्तै भएको चीनको सैन्य अभ्यासलाई गैरजिम्मेवारपूर्ण भनेको छ । स्थिति नियन्त्रण बाहिर जाने खतरा रहेको पनि उसले चेतावनी दिएको छ।

‘हामी विश्वास गर्छौं कि चीनले जे गरिरहेको छ, त्यो जिम्मेवार छैन’, राष्ट्रिय सुरक्षा सल्लाहकार जेक सुलिभानले राष्ट्रिय सार्वजनिक रेडियोसँगको एक अन्तर्वार्तामा भनेका छन् ।