काठमाडौँ– २३ बर्षिया मोडल करिश्मा ढकाल म्युजिक भिडियोसँगै टिकटकमा सक्रिय छिन् । संख्यात्मक हिसाबमा एक हजार भन्दा बढी भिडियोमा अभिनय गरिसकेकी करिश्मालाई चिनाउने कार्यमा टिकटकको पनि उत्तिकै हात छ । मोडलिङमा सक्रियता भएको छोटो समयमा नै चर्चित भएकी करिश्माको उही खोलाको पानी, तिमी मलाई प्रलय मन पर्ने लगायतका गीतहरू सर्वाधिक रुचाइएका छन् ।

बाल्यकाल देखि नै कलाकारितामा उनको लगाव थियो । ‘बाल्यकालमा स्कुलमा हुने कार्यक्रमहरूमा सहभागिता जनाउने गर्थे । मैले कति प्रतियोगितामा पुरस्कार पनि जितेकी छु’ करिश्मा भन्छिन्, ‘सेल्फी सेल्फी बोलको तीज गीत मार्फत मैले मोडलिङमा पाइला टेकेकी हुँ’ । पहिलो गीत नै दर्शकको प्रिय बनेपछि करिश्मालाई भिडियोको अफर आउन थाल्यो । 

तीज गीत मार्फत चिनिएकी करिश्माले एक महिनामा ७० वटासम्म तीज गीतको भिडियोमा नृत्य गरेकी छिन् । ‘मेरो पहिचान नै तीज गीत भएकाले होला अफर निकै आयो । मैले काम पनि उस्तै गरे । मैले एकै दिनमा पाँच वटा भिडियोसम्ममा काम गरेकी छु’ उनले भनिन् । यद्यपि उनको चाहना अभिनेत्री बन्ने छ । हिरोइन बन्ने इच्छा बोकेकी करिश्मालाई अफर नआएको पनि होइन । यद्यपि चित्त बुझ्दो भूमिका उनी कहाँ पुगेको छैन । ‘म आफू सुहाउँदो भूमिका पाए भने फिल्ममा पनि सक्रियता बढाउँछु’ उनले भनिन् । सानो पर्दामा पाएको लोकप्रियतालाई ठुलो पर्दामा समेत यथावत राख्ने तयारीमा रहेकी करिश्माले खबरहबका लागि फोटोसुट गराएकी छिन् ।