जनकपुरधाम– मधेश प्रदेका मुख्यमन्त्री लालबाबु राउतले मानव अधिकार रक्षाको सवालमा प्रदेश सरकार संवेदनशील रहेको बताएका छन् ।

राष्ट्रिय मानव अधिकार आयोगले शुक्रबार जनकपुरधाममा गरेको दुई दिवसीय मानव अधिकार रक्षक प्रादेशिक सम्मेलनको उद्घाटन कार्यक्रममा मुख्यमन्त्री राउतले प्रदेश सरकार मानव अधिकारको रक्षाको सवालमा स्थापना कालदेखि नै संवेदनशील भएर अघि बढेको बताएका हुन् ।

आफ्नो अधिकारको प्रयोग गर्दा अरुको अधिकारप्रति ख्याल मात्रै गरी दिए पनि मानव अधिकार रक्षाको सवालमा हाम्रो समाज ठूलो फड्को मार्ने उनको विश्वास छ ।

मुख्यमन्त्री राउतले मानव अधिकार रक्षाको सवालमा प्रदेश सरकार प्रतिबद्ध रहे पनि प्रहरी प्रशासनको आभावमा अपेक्षित कार्य गर्न नसकेको स्वीकार गरे ।

कार्यक्रममा उच्च अदालतका मुख्यन्यायाधीश विनोद शर्मा, नेपाल बार एशोसिएशनका राष्ट्रिय उपाध्यक्ष रामचन्द्र सिंह, मानव अधिकार रक्षक सञ्जालका केन्द्रीय अध्यक्ष श्यामा साह, मानव अधिकार आयोगका सदस्य मिहिर ठाकुर, गैरसरकारी संस्था महासंघका प्रदेश अध्यक्ष धिरेन्द्रबहादुर सिंहसहितको सहभागिता थियो ।