काठमाडौँ – सभामुख अग्निप्रसाद सापकोटा नेतृत्वको नेपाली संसदीय प्रतिनिधि मण्डल आज स्वदेश फर्किँदै छ।

अजरबैजानमा आयोजित असंलग्न आन्दोलन संसदीय सञ्जालको सम्मेलनमा सहभागी भएको प्रतिनिधिमण्डल आज साँझ काठमाडौँ आइपुग्ने सभामुख सापकोटाको सचिवालयले जनाएको छ ।

नेपाली संसदीय प्रतिनिधि मण्डलका तर्फबाट सभामुख सापकोटाले असार १६ गते सम्मेलनलाई सम्बोधन गरेका थिए। उनले भू–राजनीतिक मुद्दालगायत विश्वव्यापी स्तरका चुनौतीहरूको सन्दर्भमा असंलग्न आन्दोलनको सान्दर्भिकता अझ बढेको बताउँदै असंलग्न आन्दोलनका साझा प्रयासबाट विश्वव्यापी चुनौतीहरूलाई सम्बोधन गर्न नेपालको सहयोग  र ऐक्यबद्धता व्यक्त गरेका थिए ।

त्यस क्रममा सभामुख सापकोटाले सम्मेलनको आयोजक राष्ट्र अजरबैजानका समकक्षी साइबा गफारोवालगायतसँग दुई पक्षीय भेटवार्ता गरेका थिए ।

यही असार १४ गते त्यसतर्फ प्रस्थान गरेको प्रतिनिधिमण्डलमा प्रतिनिधि सभाका सदस्य पुष्पा भुसाल गौतम, राष्ट्रिय सभाका सदस्य रामचन्द्र राई र सभामुखका स्वकीय सचिव गोविन्द पाठक छन् ।