काठमाडौँ– विश्व साइकल तथा वातावरण दिवसको अवसरमा काठमाडौँमा विशेष साइक्लिङ भेलाको आयोजना गरिने भएको छ ।

जेठ २१ गते (भोलि) दरबारमार्गमा साइकल तथा प्रकृतिप्रेमी सम्मिलित भेलालाई उपत्यकाका नगरप्रमुख तथा विज्ञहरूले सम्बोधन गर्ने कार्यक्रम रहेको छ । विभिन्न साइकल समूह, संघसंस्था तथा समुदायको सहकार्यमा आयोजित कार्यक्रमको सुरुवात पाटन दरबार क्वायर ललितपुरबाट साइक्लिस्टहरुको जमघट गरिने जनाइएको छ । बिहान ७ः३० बजेदेखि साइकल र्‍याली पाटन दरबार स्क्वायरबाट सुरु भई पुलचोक हुँदै थापाथली, त्रिपुरेश्वर, सुनधाराबाट अघि बढेर दरबारमार्गमा बिहान ८ बजेदेखि सभामा परिणत हुने छ । पैदल सडक प्रयोगकर्ता, सार्वजनिक सवारी साधन प्रयोगकर्ता तथा आम नागरिक समेत कार्यक्रममा सहभागी हुनेछन् । 

नेपालमा अत्यधिक निजी सवारी साधन, इन्धनको खपत, धुवाँधुलो, प्रदुषण, व्यापार घाटा बढ्दै गइरहेको छ । आर्थिक संकटको भय देशमा व्याप्त छ । देशका सम्पदा सहरहरुलाई साइकल तथा पैदलमैत्री दिगो सहरका रुपमा विकास गर्न सार्वजनिक प्रतिवद्धताको शुभारम्भ स्वरुप यस कार्यक्रम आयोजना गर्न लागिएको हो । दरबारमार्गमा आयोजित भेलालाई काठमाडौँ महानगरपालिकाका मेयर बालेन्द्र शाह, ललितपुर महानगरपालिकाका मेयर चिरीबाबु महर्जन र कीर्तिपुर नगरपालिकाका मेयर राजकुमार नकर्मीका साथै कलाकार दयाहाङ राई, नागरिक अगुवा डा. विद्यानाथ कोइराला, साइकल खेलाडी उषा खनाल, अजय पण्डित क्षेत्री लगायतका व्यक्तिहरूले सम्बोधन गन कार्यक्रम रहेको छ । 

स्थानीय निर्वाचन अघि साइकल संस्कृति स्थापनार्थ त्रिवि कीर्तिपुर केन्द्रीय क्याम्पसमा विशेष कार्यशालाको आयोजना गरि कीर्तिपुर साइकल घोषणापत्र २०७९ जारी गरेको थियो । त्यस लगत्तै उपत्यका भरिका नगरप्रमुख प्रत्यासी उम्मेदवारलाई काठमाडौँ दरबारमार्गमा भेला गरि साइकल तथा पैदलमैत्री दिगो सहरी विकासका लागि प्रतिवद्धता जनाउन विशेष कार्यक्रमको आयोजना गरिएको थियो । उक्त प्रतिवद्धतालाई खबरहब डटकम लगायत मिडियाबाट प्रसारण गरिएको थियो । विश्व साइकल दिवसको अवसरमा नेपालमा यसभन्दा अघि पनि विविध कार्यक्रमहरू गरिँदै आएको थियो । यस वर्ष साइकलसँग जोडिएका विविध विषयहरूलाई स्थापित गर्न साइकल अभियानसँग संलग्न विभिन्न समूहहरूलाई एकीकृत गरि नीति निर्माण तहमै ठोस पहल गर्ने उद्देश्यले यस कार्यक्रमको आयोजना गरिएको हो । 

साइकल अभियानलाई प्राज्ञिक लगायत विविध बौद्धिक क्षेत्रसँग जोडेर साइकल बहुआयामिक समुदायलाई सांस्कृतिक सामाजिक आन्दोलनकै रुपमा अगाडि बढाउनुपर्ने आवश्यकता बोध अघिल्ला कार्यक्रमहरुमा हुँदै आएको थियो । यसैको आधारशीलाबाट सञ्जाल निर्माण र कार्यक्रम सञ्चालन मुठ्ठीदानमार्फत आपसी सहकार्य र सहभागितामूल ढङ्गले अघि बढाइएको हो । राजधानी काठमाडौँलाई पहिलो प्राथमिकतामा राखी साइकल कल्चर मुभमेन्टको आयोजना र खबरहब डटकमको सहकार्यमा साइकल संस्कृति निर्माण अभियानको सुरुवात गरिएको छ । यसपछि आगामी कार्यक्रमहरू क्रमशः तय गरी सार्वजनिक गरिने छ ।