काठमाडौँ– मोडलिङमा रमाइरहेकी नीति शाहलाई अब फिल्ममा देख्न पाइने भएको छ । मोडलिङ गर्दै धेरै फिल्मकर्मीले नोटिस गरेता पनि नीतिले फिल्ममा अभिनय गर्ने इच्छा देखाइनन् । उनलाई भुवन केसी, सन्तोष सेन लगायतका निर्माताले समेत फिल्मको लागि अफर गरेका थिए । यद्यपि उनले कसलाई ओकेु भनिनन् । तर, अब उनले फिल्ममा आफूलाई प्रस्तुत गर्ने तयारी गरेकी छिन् ।

उनले यसै वर्ष फिल्ममा प्रवेश गर्ने तयारी थालेकी हुन् । फिल्ममा काम गर्ने भएपछि म्यानेजरको रुपमा निराजन गिरीलाई नियुक्त गर्दै केही फिल्मको स्क्रिप्ट समेत अध्यन गरिरहेकी छिन् । ‘पहिला अफर आउँदा अहिले म कन्फिडेन्ट छैन भनेर पछाडि हट्नुभयो । अब चाहिँ फिल्ममा डेब्यू गर्नका लागि सकारात्मक हुनुहुन्छ । उहाँले फिल्मको स्क्रिप्ट पढिरहनुभएको छ तर कसैलाई सहमति दिनुभएको छैन’ उनका म्यानेजर गिरीले भने । फिल्ममा डेब्यूका लागि केही समयदेखि नीतिले जिमदेखि डान्स क्लास लिइरहेको पनि निराजनले जानकारी दिए ।