काठमाडौँ– ‘ए मेरो हजुर ४’ को प्रदर्शन भएसँगै निर्माता सुनिलकुमार थापा र निर्देशक झरना थापाले सिरिजमा ब्रेक लगाएका छन् ।

 होम प्रोडक्सनबाट लगातार ‘ए मेरो हजुर’ सिरिज दर्शक समक्ष ल्याइरहेका थापा दम्पतीले यसलाई ब्रेक लगाउदै ‘भागवत गीता’ को काम अगाडि बढाएका छन् । फिल्मकी गीता अर्थात् सुहाना थापाको बर्थ डेमा सार्वजनिक गर्ने गरी फिल्मको भिडियो एनाउन्समेन्टका लागि टिजर छायांकन गरिएको छ । मंगलबारदेखि जनकपुरको जानकी मन्दिर परिसरमा फिल्मको टिजर छायांकन सुरु गरिएको हो । 

‘जनकपुर मन्दिर परिसरमा हिजो र आज छायांकन भयो । फिल्मको कथा जनकपुरसँग जोडिएको भएकाले पनि टिजर यही छायांकन गरेका हौँ । फिल्ममा जनकपुरलाई ४० प्रतिशतको हाराहारीमा कैद गर्नेछौँ’ निर्माता सुनिलकुमार थापाले भने । उनले झरनाको कथालाई पटकथाको स्वरूप दिन टिम व्यस्त भएको समेत बताए । ‘यहाँ छायांकन गरिएको दृश्य फिल्ममा समेत हुनेछ । हामीले यसलाई सुहानाको बर्थ डेमा सार्वजनिक गर्ने छौँ’ उनले भने । 

फिल्मको स-साना कलाकारहरु सहित अभिनेता पनि फाइनल भइसकेको निर्माता थापाले बताए । यद्यपि उनले यसलाई केही समय पश्चात मात्र रिभिल गर्ने सोच सुनाए । ‘हामी साउनको अन्तिम साताबाट छायांकनमा जाने छौँ । यसैले गर्दा पनि विस्तारै विस्तारै फिल्मको गतिविधि सहित टिमलाई चिनाउने छौँ’ निर्माता थापाले भने ।