काठमाडौँ– परराष्ट्रमन्त्री डा. नारायण खड्काले प्रधानमन्त्री शेरबहादुर देउवा भारतीय जनता पार्टी (भाजपा) को मुख्यालयमा नेपाली काँग्रेसको सभापति भएर गएको स्पष्ट पारेको छ ।

आज साँझ त्रिभुवन अन्तर्राष्ट्रिय विमानस्थलमा पत्रकारहरूसँग कुरा गर्दै डा. खड्काले देउवा प्रधानमन्त्री भएर नभई नेपाली काँग्रेसको सभापतिको हैसियतमा भाजपा मुख्यालय गएको बताएका हुन् ।

उनले काँग्रेस सभापतिका हैसियतमा प्रधानमन्त्री देउवाले भाजपाको कार्यालयमा आउनु मर्यादाविपरीत नभएको दाबी गरे ।

भारत भ्रमणका क्रममा प्रधानमन्त्री देउवाले भाजपाको मुख्यालय भ्रमणलाई कूटनीतिक मर्यादाविपरीत भएको भन्दै आलोचना भएको थियो ।

तर, परराष्ट्रमन्त्री खड्काले नेपाली काँग्रेस र भाजपाबीचको सम्बन्धलाई थप सुमधुर बनाउन सभापतिकाे हैसियतमा भाजपा कार्यालय पुगेको बताए ।