काठमाडौं – विश्वभर थप २८ लाखमा कोरोना भाइरसको नयाँ सङ्क्रमण पुष्टि भएको छ। गत २४ घण्टामा यो खबर तयार पार्दासम्म २८ लाख ६० हजारभन्दा धेरै नयाँ सङ्क्रमित थपिएका हुन्।

कोरोनाको तथ्याङ्क अद्यावधिक गरिरहेको वल्डोमिटरले जनाए अनुसार योसँगै विश्वभर कोरोना सङ्क्रमण पुष्टि हुनेको सङ्ख्या ३८ करोड ४९ लाख नाघेको छ।

जसमध्ये ३० करोड ४८ लाख कोरोना मुक्त भएका छन्। गत २४ घण्टामा मात्रै १९ लाख ९५ हजार निको भएका छन्।

यस्तै २४ घण्टामा १० हजार बढीको मृत्यु भएसँगै कोरोनाले ज्यान गुमाउनेको सङ्ख्या ५७ लाख १६ हजारभन्दा धेरै छ।

विश्वभर अझै पनि ७ कारोड ४३ लाख सक्रिय सङ्क्रमित रहेकामा ९१ हजारको अवस्था जटिल रहेको र बाँकीको सामान्य रहेको वल्डोमिटरले उल्लेख गरेको छ।

नेपालमा संक्रमण घट्दै
नेपालमा पछिल्लो २४ घण्टामा तीन हजार ६३७ जनामा कोरोनाभाइरस संक्रमण पुष्टि भएको छ।

११ हजार ५८२ नमुना परीक्षण गर्दा तीन हजार ६३७ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयकी प्रवक्ता डा. संगीता मिश्रले जानकारी दिइन्।

उनका अनुसार ६ हजार ४९९ पीसीआर परीक्षण गर्दा दुई हजार २०५ जनामा र पाँच हजार ८३ एन्टिजेन परीक्षण गर्दा एक हजार ४३२ जनामा कोरोना संक्रमण पुष्टि भएको हो।

योसँगै देशभर सक्रिय संक्रमितको संख्या ६९ हजार २९१ जना रहेको छ। पछिल्लो २४ घण्टामा सात हजार ५५५ जनामा कोरोना संक्रमणमुक्त हुँदा १२ जना संक्रमितको मृत्यु भएको छ।

यसैगरी पछिल्लो २४ घण्टामा आठ लाख १५ हजार ७९६ जनाले कोरोनाविरुद्धको खोप लगाएका छन्।