काठमाडौँ– पाकिस्तानमा राष्ट्रिय स्वतन्त्रता दिवसको अवसरमा ‘आँप महोत्सव’ आयोजना गरिएको छ । पाकिस्तानको विदेश मन्त्रालयले राजधानी इस्लामावादमा शुक्रबार आँप महोत्सवको आयोजना गरेको हो ।

स्वतन्त्रता दिवसको अवसरमा विभिन्न कार्यक्रमहरू आयोजना गर्ने सिलसिलामा आँप महोत्सव आयोजना गरिएको अधिकारीहरूले जनाएका छन् ।पाकिस्तानको कुटनीतिमा आँप कूटनीति चर्चित रहेकाले विदेश मन्त्रालयले आँप महोत्सव आयोजना गरेको उनीहरूको भनाई छ ।  पाकिस्तानका विदेश मन्त्री बिलावाल भुट्टो जर्दारीले आँप महोत्सवले आँपको उत्पादन र आँप कूटनीति प्रर्वद्धन गर्न सहयोग पुगेको विश्वास व्यक्त गरे । पाकिस्तानको आँप विश्वभरि नै चर्चित मानिन्छ । 

विदेश मन्त्री जर्दारीले पाकिस्तानको आँपको गुणस्तर, स्वाद, विविधता र उत्पादनको मात्रा बढाउन पनि महोत्सवले प्रोत्साहन गरेको दावी गरे । ‘हामीलाई विश्वास छ की पाकिस्तानको आँप विश्वमै रुचाइएको र लोकप्रिय छ,’ मन्त्री जर्दारीले बताए । 

महोत्सवमा झण्डै २०० प्रकारका आँप राखिएको थियो । ती आँप विश्वका धेरै देशमा निर्यात हुने गरेको पनि मन्त्रालयले जनाएको छ । महोत्सवमा विदेशी कूटनीतिज्ञ र पाकिस्तानमा रहेका अन्य विदेशीहरूसँग स्थानीय बासिन्दाको उल्लेख्य सहभागिता रहेको थियो ।
पाकिस्तानमा अहिले ७५ औँ स्वतन्त्रता दिवस मनाइएको छ । पाकिस्तानमा हरेक वर्षको अगस्ट १४ मा स्वतन्त्रता दिवस मनाइन्छ ।