काठमाडौं– अफ्रिकी मुलुक जिम्बाब्वेमा चिनियाँ खनिज कम्पनीहरूले जथाभावी उत्खनन गर्ने गरेको पाइएको छ । इनसाइड ओभर अनलाइन समाचार पोर्टले सार्वजनिक गरेको खोजमूलक रिपोर्टमा जिम्बाब्वेका खानीहरुमा चिनियाँ कम्पनीहरूले पर्यावरण र पूर्वाधारको पर्वाह नै नगरी उत्खनन गर्ने गरेको पाइएको हो ।

जिम्बाब्वेको खनिज सम्पन्न ग्रेट डाइक क्षेत्रका स्थानीयहरुले यस्तो गतिविधिको लामो समय देखि विरोध समेत गर्दै आएका छन् । यो क्षेत्रमा खानी उत्खनन गर्ने क्रममा खाल्डोहरु बन्न पुगेको र त्यहाँ मानिस सहित वस्तुभाउ खसेर मर्ने गरेको उनीहरूको भनाइ छ ।

त्यस्तै, जिम्बाब्वेकै डोहवे नदी नजिकै सञ्चालित ह्वाइट एएसबी सुनखानीमा पनि चिनियाँ खनिज कम्पनीहरुले भारी उपकरणको प्रयोग गरेका कारण नदी मै असर पर्न गएको बताइएको छ ।

जिम्बाब्वेको मुतोको जिल्लामा चिनियाँ कम्पनीद्वारा सञ्चालित अर्को खानी उत्खनन गर्ने क्रममा त्यहाँका स्थानीहरू विस्थापित समेत हुन पुगेको रिपोर्टमा उल्लेख छ ।

चीनले हरेक वर्ष अफ्रिकाबाट १ खर्ब डलर बराबरको खनिज पदार्थ आयात गर्दै आएको छ । जिम्बाब्वेमा चिनियाँ कम्पनीहरूले तामा, कोइला, सुन, म्याग्निज जस्ता खनिज पदार्थ उत्खनन गर्दै आएका छन् ।