काठमाडौं– अभिनेता सुनील थापा बलिउड फिल्ममा व्यस्त हुने भएपछि फिल्म ‘लाखे’मा उनको स्थानमा अर्का अभिनेता प्रशान्त ताम्राकार अनुबन्धित भएका छन् । हरि मल्ल ठकुरी कार्यकारी निर्माता रहेको फिल्ममा प्रशान्तले प्रमुख भिलेनको भूमिका निभाउनेछन् ।

अभिनेता ताम्राकारले आफु ‘लाखे’ मा जोडिन पाउदा खुसी लागेको बताए । ‘लाखे’ मल्टिस्टार कलाकारले भरिएको फिल्म हो’ ताम्राकारले भने ‘एकसाथ धेरै स्टार कलाकारसँग काम गर्न पाउदा निकै खुसी लागेको छ ।’ फिल्ममा आफुले सक्दो नयाँ र राम्रो काम गर्न कोसिस गर्ने ताम्राकारले सुनाए ।

सम्राट बस्नेत निर्देशित फिल्म ‘लाखे’को काठमाडौं उपत्यकाका विभिन्न स्थानमा छायांकन भइरहेको छ । फिल्ममा अनुपविक्रम शाही, आर्यन अधिकारी, अर्पण थापा, सुशील सिटौला, बर्षा राउत, रोहित रुम्बालगायतका कलाकारको अभिनय छ ।

ग्लोबल मिडिया एण्ड रिसर्च सेन्टर तथा औरियन प्रोडक्सनको ब्यानरमा निर्माण हुने फिल्मका निर्माता सिजन अर्याल हुन् । कथासमेत निर्माता अर्यालकै रहेको फिल्मको गणेश मल्ल ठकुरी प्रस्तुतकर्ता रहेका छन् ।