जुम्ला– कृषि विकास कार्यालय जुम्लाले महिलाको कार्यबोझ घटाउन यान्त्रिक करण मेसिन वितरण गरिएको छ । जुम्लाको कृषि पेसामा सबैभन्दा बढी महिला आबद्ध छन् । उनीहरूको कार्यबोझ घटाउन यस्ता आधुनिक मेसिनको ब्यवस्था गरिएको हो । जुम्लाका आठवटै पालिकाका  समूह, सहकारी, निजी उद्यमीलाई अनुदानमा कृषि औजार तथा प्रविधि हस्तान्तरण गरिने भएको कृषि विकास कार्यालयका प्रमुख गणेश अधिकारीले बताए ।

उनले भने, ‘यान्त्रिक करण, औजारका लागि गत भदौमा आवेदन मागिएको थियो । त्यसपछि फागुनमा छनोट गरिएको हो ।अहिले गहुँ काट्ने र धान चुट्ने १८ वटा थ्रेसर, आएका छन । १६ वटा मल्टि क्रसर मेसिन दिइएको हो । यो मेसिनले खेती लगाउनका लागी जोत्ने काम गर्दछ ।’  मल्टि क्रसर मेसिनको मूल्य किसानले व्यक्तिगत किन्नुपरेको  खण्डमा ४५ हजार पर्ने गरेको छ । यस्ता औजार कृषि विकास कार्यालयमार्फत अनुदानमा आउने भएपछि किसानले राहतको महसुस गरेका छन् । प्रमुख अधिकारी भन्छन्, ‘दुईवटा ओखरको तेल पेल्ने मेसिन, तीनवटा चिनो काट्ने मेसिनसमेत आएका छन्।  छनोटमा परेका किसानलाई  हस्तान्तरण गर्ने तयारी भएको छ ।’

सहकारी र कृषक समूहका लागि ३० प्रतिशत अनुदान र निजी उद्यमीका लागि ५० प्रतिशत अनुदानमा यान्त्रिक करण कार्यक्रमअन्तर्गत थ्रेसर, मेसिन उपलब्ध गराइने प्रमुख अधिकारीले बताए । विशेषगरी महिलाको कार्यबोझमा सहज  ल्याउन र कृषिमा व्यावसायिकता बनाउन किसानका मागका धारमा आवश्यक कृषि औजार तथा उपकरण उपलब्ध गराइएको उनको भनाइ छ । 

उपकरण पाउने भएपछि गुठीचौगाउँपालका-४ की कृष्णमाया अधिकारी उत्साहित छिन् । उनको  मष्टकृषि  तथा पशुपंक्षी पालन उद्योग दर्ता छ । अधिकारीले भनिन्, ‘जुम्लाको मार्सी धान चुट्ने र गहुँ चुट्ने  मेसिन औजार तथा प्रविधि पाएपछि हाम्रो दैनिकी पनि सहज र समयको बचतसँगै आम्दानीका लागि पनि सहज भएको छ । किसानले आफै किन्नुपरेमा थ्रेसर मेसिन ५५ हजार जति पर्ने गर्दछ ।’  सरकारले नै कृषि क्षेत्रमा आधुनिकीकरणको पहुँचसँगै कृषकहरूले आफ्ना खेतबारीमा उब्जाएका बाली भित्र्याउन सहज बनाउने लक्ष्यका साथ यस्ता खालका सामग्री उपलब्ध गराउँदै आएको छ । बाली चुट्ने कामदेखि, जोत्ने सम्याउने सबै काम कृषियन्त्रले गरेपछि किसानको श्रम, लगानी र समय बचत हुने भएको छ ।