विराटनगर– शहरी विकासमन्त्री रामकुमारी झाँक्रीले संघीयता सफल बनाउन सबै तहका सरकार मिलेर अघि बढ्नुपर्ने बताएकी छन् ।

शहरी विकास मन्त्रालयद्वारा प्रदेश १ को विराटनगरमा शुक्रबार भएको राष्ट्रिय शहरी नीति तथा शहरी विकास ऐन तर्जुमा सम्बन्धी प्रदेशस्तरीय छलफल तथा अन्तर्क्रियामा  मन्त्री झाँक्रीले संघीयताको मर्मअनुसार तीनवटै तह मिलेर अघि बढ्नुपर्ने बताएकी हुन् ।

कार्यक्रममा प्रदेश १ का मुख्यमन्त्री राजेन्द्रप्रसाद राईले संघीयताको मर्मअनुसार विकास र बजेट विकेन्द्रित हुनुपर्ने धारणा राखेका छन् ।

ठूला शहरमा मात्र विकास र लगानी केन्द्रित हुँदा बसाई सराईको क्रम बढेको बताउँदै उनले सबै क्षेत्रमा विकास पुग्ने गरी नीति परिमार्जन गर्नुपर्ने पनि बताए ।

त्यस्तै, शहरी विकास मन्त्रालयका सचिव डा. रमेशप्रसाद सिंहले संघीयतापछि शहरी नीति परिमार्जनको टड्कारो आवश्यकता देखिएको बताए ।

शहरी विकास भवन निर्माण विभागका उपमहानिर्देशक दिलिप भण्डारीले मन्त्रालयले सातै प्रदेशमा सबैको रायसहित शहरी नीति परिमार्जन गरिने बताएका थिए ।