दोहा– दलाल (एजेन्ट)ले देखाएको प्रलोभनमा पर्दा विदेशी भूमि पुगेर अलपत्र पर्ने नेपालीको संख्या बढ्दै गएको छ । स्वदेश तथा विदेशमा रहेका एजेन्टसँगको समन्वयमा विदेश जाने नेपाली अलपत्र परेका धेरै समाचार पनि सार्वजनिक हुन थालेका छन् ।

पछिल्लो क्रममा रोजगारीका लागि युनाइटेड अरब इमिरेट्स् (यूएई) पुगेका ७ नेपाली युवा अलपत्र परेका छन् । उनीहरु गत बर्षको सेप्टेम्बर १४ तारिखमा त्यहाँ पुगेका थिए ।

त्यहाँ पुगेर अलपत्र पर्नेहरुमा नुवाकोटका रामबहादुर तामाङ, राजेन्द्र तामाङ, सोमबहादुर तामाङ, जयसिंह तामाङ, मानबहादुर तामाङ, प्रविन तामाङ र सागर तामाङ छन् । एकै जिल्लाका उनीहरूलाई नेपालमा रहेकी एजेन्ट शान्ति केसी तथा दुबईमा रहेका एजेन्ट नरहरि गौतमले दुबई पुर्‍याएका थिए । उनीहरूमध्ये तीन जनालाई सिक्युरिटी गार्ड र चार जनालाई बाइक राईडरमा मासिक २ हजार १ सय दिराम तलब हुने भन्दै पर्यटक (टुरिस्ट) भिसामा दुबई पुर्‍याइएको थियो । राम्रो तलब पाउने आशामा अहिले पीडित बन्नुपरेको रामबहादुर तामाङले बताए ।

‘घरबाट ऋण काढेर कत्रो सपना बोकेर दुबई आएका थियौ, अन्त्यमा यहाँ आएर न त काम नै पाइयो । अब कसरी ऋण तिर्ने हो,’ उनले भने, ‘एजेन्ट केसी र गौतमलाई प्रतिव्यक्ति तीन लाख बुझाएर हामी यहाँ हौँ । पहिला आकर्षक रोजगारीको प्रलोभन देखायो अहिले यहाँ ल्याएर अलपत्र पार्यो ।’

नेपालबाट सिक्युरिटी गार्ड तथा बाइक राईडरमा भनेर पठाएको भएपनि अन्तिममा होटलमा भाँडा माझ्ने काम लगाएर एजेन्ट सम्पर्कबिहीन भएकी उनको भनाइ छ ।

‘बुझाएको तीन लाख मध्ये दुबईमा रहेको एजेन्ट गौतमलाई १ लाख ६८ हजार र बाँकी पैसा नेपालमा रहेकी अर्की एजेन्ट शान्ति केसीलाई दिएका हौँ,’ रामबहादुरले थपे, ‘अहिले दुवै एजेन्ट सम्पर्कबिहीन छन्, दैनिक सयौँ पटक फोन गर्छौ फोन नै उठाउँदैन् । अब हामी कहाँ जाने के खाने ?’

दुई जना भने घरबाट पैसा मगाएर स्वदेश नै फर्किसकेका छन् । उनीहरूले आफूहरूलाई पठाउने एजेन्टलाई कारबाही र आफूहरूको सकुशल उद्धार गरिदिन माग गरेका छन् । उनीहरूले उपलब्ध गराएको एजेन्ट शान्ति केसीको मोबाइलमा सम्पर्क गर्दा फोन उठेन ।