दोहा– वैदेशिक रोजगारीका लागि साउदी अरब पुगेका एक नेपालीको मृत्यु भएको छ । भानु नगरपालिका तनहुँका ३३ बर्षीय सन्तोष अधिकारीको राति सुतेको अवस्थामा मृत्यु भएको हो ।

रातिको ड्युटीलाई सकेर खाना खाइसकेपछि कोठामा सुतेका अधिकारी राति खोकेको सुनेपछि साथीहरूले उपचारका लागि अस्पताल पुर्‍याएका थिए ।

स्थानीय प्रहरीको सहयोगमा साथीहरूले उनलाई अस्पताल पुर्‍याएका थिए । अस्पतालले उनलाई तत्कालै मृत्यु भएको जनाएको छ ।

उनी साउदी अरबमा रहेको प्रतिष्ठित कम्पनी अल्मराईको दम्माम शाखामा वायर हाउसमा कार्यरत थिए ।

उनी आउँदो फेब्रुअरीमा नेपाल फर्किने तयारीमा थिए । नेपाली दूतावास स्रोतका अनुसार मृतकको शवलाई कम्पनी र परिवारसँग समन्वय गरेर जतिसक्दो चाँडो नेपाल पठाइने तयारी थालिएको छ ।

उनको परिवारमा आमा, पत्नी, एक छोरा र एक छोरी रहेको नजिकका साथीभाइहरूले बताएका छन् ।