काठमाडौँ– विभिन्न मुलुकबाट नेपालको जुनसुकै स्थानमा रेमिट्यान्स रकम तुरुन्त पठाउन सकिने गरी एनआईसी एसिया बैंक र ट्रान्सक्यास इन्टरनेसनल (आइपे) बीच व्यवसायिक सम्झौता भएको छ ।

सम्झौतापत्रमा बैंकका प्रमुख कार्यकारी अधिकृत रोशनकुमार न्यौपानेले र ट्रान्सक्यास क्षेत्रीय निर्देशक आकृति लामिछानेले हस्ताक्षर गरेका छन् ।

मलेसिया, जापान, हङकङ, सिङ्गापुर, न्युजिल्यान्ड, अस्ट्रेलिया, दक्षिण कोरिया, अमेरिका, बेलायत र मध्यपूर्व (गल्फ) का विभिन्न देशहरूबाट नेपालीहरूले बिना झन्झट आईपेका एजेन्टहरू, मोबाइल एप तथा वेबसाइटमार्फत एनआईसी एसिया बैंक तथा नेपालका अन्य कुनै बैंक खातामा तुरुन्त रेमिट्यान्स रकम पठाउन सक्ने जनाइएको छ ।

यसअतिरिक्त विदेशबाट आफूले इच्छाएको व्यक्तिको नाममा रेमिट्यान्स पठाउन सकिनेछ । त्यस्तो रकम एनआईसी एसिया बैंकका सबै शाखा, विस्तारित काउन्टरहरू र १२ हजारभन्दा बढी रेमिट्यान्स एजेन्टहरूमार्फत सहजरूपमा बुझन सकिने पनि जनाइएको छ ।

यस व्यावसायिक सम्झौताबाट विदेशमा कमाएको रकम देशभर पठाउन सकिने बैंकले आइतबार जारी गरेको विज्ञप्तिमा उल्लेख गरिएको छ ।

डिजिटल बैंकिङ आत्मसात गर्दै आएको एनआईसी एसिया बैंकले रेमिट्यान्स कारोबार समेत डिजिटलमैत्री बनाउँदै लैजाने क्रममा मोबाइल बैंकिङ एपमा आन्तरिक रेमिट्यान्स पठाउने तथा रेमिट्यान्स प्राप्त गर्न मिल्ने नवीन सुविधाको सुरुवात गरेको विज्ञप्तिमा जनाइएको

मुलकभर एनआईसी एसिया बैंकका ३५६ शाखा कार्यालय, ४७३ एटीएम, ७० वटा विस्तारित काउन्टर छन् । यसैगरी, ८१ वटा शाखारहित बैंकिङ सेवा पनि छ ।

एनआईसी एसिया बैंक मुलुककै सबैभन्दा ठूलो शाखा सञ्जाल भएको बैंक हुन पुगेको विज्ञप्तिमा जनाइएको छ ।

हालसम्म २७ लाख ३६ हजारभन्दा बढी निक्षेप खाता, ९१ हजारभन्दा बढी कर्जा खाता गरी २८ लाख २७ हजारभन्दा बढी खाताहरू रहेको पनि जनाइएको छ ।

एनआईसी एसिया बैंकले प्रत्यक्ष र अप्रत्यक्ष गरी गत आर्थिक वर्षमा करिब २ अर्ब ८३ करोड रुपैयाँ राजस्व बुझाएको बैंकका नायब प्रमुख कार्यकारी अधिकृत सुधीरनाथ पाण्डेले जनाएका छन् ।