काठमाडौं– नेपालका पेजेन्ट कोरियोग्रोफर अश्विनीकान्त झा ‘ राष्ट्रिय व्यक्तित्व तथा स्रष्टा सम्मान २०७८’बाट सम्मानित भएका छन् । रिबन इन्टरटेन्मेन्टको ७ औं वार्षिकोत्सबको अवसरमा आयोजना गरिएको कार्यक्रममा उनलाई गणतन्त्र नेपालका प्रथम उप–राष्ट्रपति परमानन्द झा, विशेष अतिथि त्रिभुवन अन्तराष्ट्रिय विमानस्थलका महाप्रबन्धक प्रतापबाबु तिवारी, नेपाली फिल्मकी प्रथम नायिका भुवन चन्द र आयोजक रिवन इन्टरटेन्मेन्टका सिइओ तथा निर्देशक निशुकान्त झाले संयुक्त रुपमा सम्मान गरेका थिए ।

विगत लामो समयदेखि पेजेन्ट तथा फेशन कोरियोग्राफरको रुपमा अनवरत आफ्नो उत्कृष्टता प्रदान गर्दै आएका झाले थुप्रै राष्ट्रिय तथा अन्तराष्ट्रिय अवार्डका साथै सम्मान प्राप्त गरेका छन् । फेशन डिजाइनर काउन्सिल अफ नेपालका सल्लाहकारसमेत रहेका कोरियोग्राफर अश्विनी वर्तमान समयमा नेपालका एकदमै चर्चित, व्यस्त तथा सफल कोरियोग्राफरमा पर्दछन् ।

कोरियोग्राफर झा सम्मानित भएको उक्त विशेष समारोहमा चलचित्र, सङ्गीत, समाजसेवा, मनोरंजन, फेसन डिजाईन, पेजेन्ट लगायतका क्षेत्रमा कार्यरत विभिन्न व्यक्तित्वहरूलाई पनि उक्त समारोहमा सम्मानित गरिएको छ । कार्यक्रममा ६ दर्जन बढी स्रष्टालाई पनि सम्मान गरिएको थियो ।