काठमाडौँ– काठमाडौँका प्रमुख जिल्ला अधिकारी कालीप्रसाद पराजुलीले उपत्यकामा अत्यावश्यक वस्तुको सहज आपूर्ति भइरहेको बताएका छन् ।

अत्यावश्यक वस्तु बोकेका सवारीलाई नाकामा नै रोकिएको गुनासो आएपछि सोमबार काठमाडौँको नागढुंगा नाका अनुगमनमा पुगेका प्रमुख जिल्ला अधिकारी पराजुलीले नाकाबाट सुरक्षा सतर्कता अपनाएर निर्वाध रुपमा अत्यावश्यक वस्तु बोकेका सवारी साधनलाई प्रवेश दिइएको बताए ।

उपत्यकामा जारी गरिएको निषेधाज्ञालाई सर्वसाधारणले पालना गरेका कारण नै कोरोना संक्रमितको संख्या घट्दै गएको उनको भनाइ छ । पराजुलीले जेठ २० गतेदेखि खाद्यान्न र निर्माण कार्यलाई खुकुलो बनाइने पनि जानकारी दिए ।

कोरोना महामारीलाई रोक्न उपत्यकाको प्रशासन कार्यालयले जेठ २० गतेसम्म उपत्यकामा कडा निषेधाज्ञा जारी गरेको छ ।