काठमाडौँ- खेलाडी र समाजसेवाको आवरणमा लागुऔषध कारोबार गरको आरोपमा प्रहरीले लतिपुरबाट एक जनालाई पक्राउ गरेको छ ।

महानगरीय प्रहरी परिसर ललितपुरका अनुसार तीन महिनाको अनुसन्धानपछि ललितपुर भलिवल क्लबको टिम म्यानेजर बताउने अनुप श्रेष्ठलाई ५० ग्राम लागुऔषध एम्फेटामाइन (आइस ड्रग) सहित पक्राउ गरेको हो ।

परिसर प्रमुख एसएसपी किरण बज्राचार्यका अनुसार अनुपलाई आइतबार सूचनाका आधारमा कुमारीपाटीबाट लागूऔषध एम्फेटामाइनसहित पक्राउ गरिएको हो ।

अनुसन्धान अधिकारीहरुका अनुसार भलिवल क्लवसँगै टोल सुधार समितिमा रहेका अनुपले त्यही आवरणमा काठमाडौं उपत्यकाका धनाढ्य युवायुवती र खेलाडीहरुलाई महँगो पार्टी ड्रग्स एम्फेटामाइन बिक्री गर्दै आएका थिए ।

प्रहरीले अनुपसँगै अन्य दुई जना अमृता खड्का र परदु गुरुङलाई पक्राउ गरेको छ । प्रहरीले अनुपको कोठाबाट ५० ग्राम अवैध लागुऔषध एएम्फेटामाइन, त्यसलाई जोख्ने डिजिटल तराजु, अन्य केही लागुऔषध र ५० हजार रुपैयाँ बरामद गरेको छ ।

अनुसन्धान अधिकारीका अनुसार अनुप आफैँ सेवनकर्ता हुन् र उनको लागुऔषधको डिलर भएको पनि खुलेको छ ।