काठमाडौँ– सभामुख अग्निप्रसाद सापकोटाले अख्तियार दुरुपयोग अनुसन्धान आयोग लगायतका विभिन्न संवैधानिक आयोगहरूमा नियुक्तिका लागि सिफारिस भएका व्यक्तिहरूको संसदीय सुनुवाइका लागि संघीय संसद् सचिवालयमा पठाइएका कागजात फिर्ता पठाएका छन् ।

सभामुख सापकोटाले आइतबार संसदीय सुनुवाइका लागि प्राप्त भएका कागजात फिर्ता पठाइएको जानकारी दिएका हुन् ।

उनले अहिलेको अवस्थामा संसदीय सुनुवाइ हुन सक्ने अवस्था नरहेकाले सिफारिस फिर्ता पठाउने निर्णय लिएको बताएका थिए ।

प्रतिनिधिसभा नरहेकाले सुनुवाई हुने अवस्था नरहेकाले र अनुकुल परिस्थिति नदेखिएको तथा विगतको नजिरलाई हेरेर पत्र फिर्ता गरिएको सचिवालयका प्रवक्ता रोजनाथ पाण्डले जानकारी दिए ।

हेरौँ भिडियो

त्यस्तै सभामुखलाई जानकारी नदिई संवैधानिक परिषद्को बैठक बसेर सिफारिस गरिएकोले संसदको संयुक्त बैठक र संयुक्त समिति कार्यसञ्चालन नियमावली २०७५ को नियम ६ बमाोजिम सभामुखले आफूमा निहित अधिकार प्रयोग गरी सवै कागजात परिषद् सचिवालयमा नै फिर्ता पठाएको प्रवक्ता पाण्डले बताए ।

उनले सुनुवाई समितिले ४५ दिनभित्र सुनुवाई गर्नुपर्ने र समिति नभएको अवस्थामा नाम फिर्ता पठाउने विगतको नजिर रहेको समेत जानकारी दिए ।

यसअघि पुस ५ गते संसद् सचिवालयमा संवैधानिक परिषद्ले विभिन्न संवैधानिक आयोगहरूमा नियुक्तिका लागि पत्राचार गरेको थियो ।

संवैधानिक निकायमा रिक्त पदहरुमा नियुक्तिका लागि नेपालको संविधानको धारा २९२ बमोजिम संसदीय सुनुवाई गर्नुपर्ने प्राबधान छ ।

यस्तो छ पत्र