काठमाडौँ– नेकपा माओवादी केन्द्रको जारी आठौं राष्ट्रिय महाधिवेशनमा अध्यक्ष पुष्पकमल दाहाल प्रचण्डको राजनीतिक प्रतिवेदनमाथि छलफल सकिएको छ। विभिन्न २५ वटा समूह बनाएर प्रतिवेदनमाथि समूहगत छलफल गरिएको थियो ।

विहीबार बन्दसत्रमा निष्कर्ष प्रस्तुत गर्न बाँकी रहेका १४ वटा समूहका टोली नेताले प्रस्तुती दिएका छन् । बुधबार ११ वटा समूहले प्रस्तुती दिएका थिए ।

शुक्रबार दिउँसो १ बजे बन्दसत्र सुरु हुनेछ। शुक्रबार अनुशासन, लेखा र निर्वाचन आयोगको प्रतिवेदन पेश गर्ने र त्यसपछि प्रचण्डले जवाफ दिनेछन्।

प्रचण्डको प्रस्तुतमाथि दुईवटा फरकमत पनि पेश भएका छन् । राम कार्की र लेखनाथ न्यौपानेले छुट्टाछुट्टै फरमत पेश गरेका छन् । ती फरकमत बन्दसत्रमा वाचन गर्न दिने कि नदिने भन्ने विषयमा निर्णय गर्न स्थायी कमिटीको बैठक बोलाइएको छ ।