काठमाडौँ– नेकपा (एकीकृत समाजवादी)का वरिष्ठ नेता झलनाथ खनालले आफू अब कुनै कार्यकारी पदमा नरहने बताएका छन् ।

स्वास्थ्यउपचारपछि सोमबार स्वदेश फर्किएका नेता खनालले विमानस्थलमा सञ्चारकर्मीहरुसँग सो कुरा बताएका हुन् । नेता खनालले आफू ७० वर्ष पार गरिसकेको बताउँदै कुनै कार्यकारी पदमा नरहने बताए ।  उनले भने, ‘म ७० वर्ष पुगिसक्या हुनाले कुनै कार्यकारीणी पोष्ट दाबी गर्दिन ।’

त्यस्तै आफ्नो बाँकी जीवन पार्टी निर्माणमा लगाउने बताए । नेता खनालले कम्युनिष्ट सरकार ढल्यो भनेर गोहीको आँशु बगाउनु आवश्यक नरहेको समेत बताए ।

खनालले भने, ‘म यहाँबाट जाँदा भारी मनले गएको थिएँ । त्यसबेला एकता आह्वान गरेको थिएँ । यो बीचमा कम्युनिष्ट पार्टीको सरकार ढल्यो । तर, यसमा कुनै गोहीको आँशु बगाउनुपर्ने आवश्यकता छैन ।’

दिल्लीस्थित एपोलो अस्पतालमा मिर्गौंला प्रत्यारोपण गराएर नेता खनाल सोमबार स्वदेश फर्किएका हुन् । खनाललाई स्वागत गर्न अध्यक्ष माधवकुमार नेपालसहितका नेताहरू त्रिभुवन विमानस्थलमा पुगेका थिए । स्वास्थ्य उपचारको लागि उनी गत असार २ गते नयाँ दिल्ली प्रस्थान गरेका थिए ।