काठमाडौँ– गलत कागजात पेश गर्ने १० जना विद्यार्थीलार्ई आइतबार बसेको चिकित्सा शिक्षा आयोगको कार्यसमितिले आरक्षण तर्फको योग्यताक्रम सूचीबाट हटाएको छ ।

चिकित्सा शिक्षा तर्फ स्नातक तहको गत साउन ९ देखि १३ सम्म सञ्चालित एकीकृत प्रवेश परीक्षाको नतिजाको योग्यता क्रममा रहेका विद्यार्थीलाई आरक्षण समूहबाट हटाएको हो ।

विद्यार्थीहरुले कक्षा ६ देखी १० सम्म सार्वजनिक विद्यालयमा अध्ययन गरेको प्रमाण पेश गरे पनि छानविनका क्रममा पुष्टि हुन नसकेकाले १० जना विद्यार्थीलाई छात्रवृत्ति प्रदान नगर्ने आयोगले जनाएको छ ।

आयोगले एमबीबीएसतर्फ अमनकुमार चौधरी (आदीवासी जनजाती र थारु), बीरेन्द्र धिताल, गगन प्याकुरेल र सूर्यकिरण जोशीलाई (खस आर्य र पिछडिएको क्षेत्र)को समूहबाट हटाएको छ ।

त्यस्तै, लकसन शाही (पिछडिएको क्षेत्र), सुजन घिमिरे (पिछडिएको क्षेत्र), स्वस्तिका सुन्दास (महिला, दलित महिला र दलित), स्मारिका श्रेष्ठ (महिला र आदिवासी जनजाती) लाई आरक्षणबाट हटाइएको हो ।

त्यस्तै बीडीएसतर्फका सूर्य किरण जोशीलाई खस आर्य र पिछडिएको क्षेत्रबाट र स्मारिका श्रेष्ठलाई महलिा र आदिवासी जानजातिको समूहमा छात्रवृत्ति प्रदान नगर्ने निर्णय आगोगले गरेको छ ।

आयोगमा सार्वजनिक विद्यालयमा अध्ययन गरेको प्रमाण पेश गरे पनि ४५ प्रतिशत छात्रवृत्तिको योग्यता क्रममा रहेका तर उनीहरुमाथि उपर सत्य कागजात पेश नगरेको भनी उजुरी परेपछि आयोगले छानविन गरेको थियो । छानविनका क्रममा विद्यार्थीहरुले पेश गरेका प्रमाणपत्र पुष्टि गर्न नसेपछि उनीहरुलाई आरक्षण योग्यताक्रमबाट हटाइएको आयोगले जारी विज्ञप्तिमा उल्लेख गरिएको छ ।