काठमाडौँ- आज साउन १५ अर्थात खिर खाने दिन । नेपाली समाजमा परापूर्व कालदेखि यो सांस्कृतिक पर्व मनाइँन्छ । यसैबीच नेकपा एमालेका नेताहरुले पनि साउन १५ मनाएका छन् ।

शुक्रबार एमाले पार्टी कार्यालय थापाथलीमा उनीहरुले साउन १५ मनाएका हुन् । एमाले विवाद समाधानका लागि बसेको बैठकपछि उनीहरुले कार्यालय परिसरमै खिर खाएर साउन १५ मनाएका हुन् ।

आजको बैठकले विवाद समाधानका लागि कार्यदलले गरेका १० बुँदे सहमति कार्यान्वयन गरेर जानुपर्नेमा जोड दिएको महासचिव ईश्वर पोखरेलले बताए ।

उनले शनिबार पार्टीको स्थायी कमिटी बैठक बस्ने र बैठकले विधान अधिवेशन लगायत विषयमा निर्णय लिने जानकारी दिए । एमालेको विवाद समाधानका लागि गठित कार्यदलले असार २८ गते १० बुँदे सहमति गरेको थियो ।