शिशुको जन्मपछि ६ महिनासम्म केवल आमाको दुध मात्र ख्वाउन चिकित्सकहरु सल्लाह दिन्छन् । ६ महिनापछि शिशुलाई बिस्तारै थप आहार ख्वाउनु पर्ने चिकित्सकहरुको सुझाव छ । ६ महिनासम्म आमाको दुध मात्र खाने बच्चामा पखाला, पेटसम्बन्धी समस्या वा अन्य संक्रमण हुदैँन साथै रुने वा तौल कम हुने सम्भावना पनि हुदैँन ।

जन्मदेखि ६ महिनासम्म आमाको दूध मात्र ख्वाउने गरेमा आमाको जीउडाल पनि विस्तारै कम हुँदै जान्छ । साथै आमालाई पनि कुनै शारीरिक समस्या हुदैँन । अझ आमाको दुध मात्र खाने बच्चाहरु हतपत बिरामी पर्दैनन्, रुघाखोकी, पखाला, ज्वरो लाग्दा पनि सामान्य रूपमा निको हुने सम्भावना हुन्छ । साथै यस्ता बच्चाहरु भित्रैबाट बलिया भएजस्तो लाग्छ ।

स्तनपानले शिशुसँगै महिलामा स्वास्थ्यसम्बन्धी धेरै सकारात्मक परिवर्तन ल्याउने गर्दछ । स्तनपान गराउँदा महिलाको शरीरमा आक्सिटोसिन नाम गरेको हार्मोन उत्पन्न हुन्छ । यो हार्मोनले पाठेघरलाई खुम्च्याएर आफ्नै पुरानै आकारमा छिट्टै फर्किन सघाउँछ । सुत्केरीपछि धेरैजसो महिला आफ्नो बढेको तौललाई लिएर चिन्तित रहन्छन् । उक्त तौलमा कमी ल्याउनु वा पुरानै अवस्थामा फर्कन स्तनपानले सघाउँछ ।

सुत्केरीपछि केही महिलामा हुने उदासी रोगसमेत स्तनपान गराउने आमामा नगराउनेहरूको दाँजोमा धेरै कम देखिएको छ । आमाको स्वास्थ्यलाई स्तनपानले फाइदा पुर्‍याउँदै आएको समय शिशुहरूलाई त यसले झन् ज्यान नै जोगाइरहेको छ । त्यसैले चिकित्सकहरु जन्मदेखि ६ महिनासम्म आमाको दूधको अतिरिक्त पानी लगायतका कुनै पनि वस्तु शिशुलाई नदिन सल्लाह दिन्छन् । एजेन्सीको सहयोगमा