नवलपुर– पूर्वी नवलपरासी जिल्लामा आज एकैदिन तीन जना कोरोना संक्रमितको मृत्यु भएको छ ।

आज कावासोती नगरपालिकाका २ जना र गैंडाकोटका १ जनाको उपचारका क्रममा मृत्यु भएको जिल्ला स्वास्थ्य कार्यालय नवलपरासीपूर्वले जनाएको छ ।

कावासोती नगरपालिका ३ की ५६ बर्षीया महिलाको आज बिहान कावासोती नगरपालिका १६ डण्डास्थित मध्यविन्दु जिल्ला अस्पतालमा मृत्यु भएको हो ।

जेठ ९ गते जिल्ला अस्पतालमा कोरोना पोजेटिभ पुष्टी भएकी ती महिला जेठ ११ गते चितवनस्थित मेडिकल कलेज अफ साइन्सेज (सिएमएस) भरतपुरमा भर्ना भएकी थिइन् । शनिवार राती पुनः मध्यबिन्दु जिल्ला अस्पतालमै ल्याइएकी ती महिलाको आज विहान मृत्यु भएको अस्पताल प्रशासनले जनाएको छ ।

यस्तै, बैशाख २६ गते कोरोना पुष्टि भएका कावासोती ८ कै ४१ बर्षका पुरुष र गैंडाकोट नगरपालिका वडा नं. १७ की ६० बर्षीया महिलाको भरतपुरस्थित सिएमएस अस्पतालमा उपचारका क्रममा मृत्यु भएको स्वास्थ्य कार्यालय नवलपुरले जनाएको छ ।

आज थप ३ जनाको मृत्यु भएसँगै नवलपुरमा कोरोनाको नयाँ भेरियन्ट शुरु भएपछि बैशाखयता मात्रै मृत्यु हुनेको संख्या ४५ पुगेको छ ।