मुम्बई(बलिउड लाइफ)– बलिउड अभिनेता रणवीर सिंहको फिल्म ‘८३’बाट निर्माता तथा व्यापार विश्लेषकले ठूलो आशा राखेका थिए । तर फिल्मले बक्सअफिसमा राम्रो व्यापार गर्न सकेन । फिल्म रिलिजको पाँच दिनमा फिल्मले ६० देखि ७० करोडको आँकडा पनि पार गर्न सकेको छैन ।

फिल्मको खराब कमाईले निर्मातालाई ठूलो झड्का लागेको छ । त्यहीकारण उनीहरु फिल्म कसरी फ्लप भयो भन्ने अध्ययनमा लागेका छन् । फिल्म असफल भएपछि निर्माताहरु आरोपऔप्रत्यारोपमा उत्रिएका छन् । केही निर्माताले फिल्मको निर्माण शैलीमाथि प्रश्न उठाएका छन् ।

उनीहरुले निर्देशक कबीर खानले फिल्मलाई वृतचित्र शैलीमा निर्माण गरेको आरोप लगाएका छन् । त्यही कारण दर्शक फिल्मको कथासँग जोडिन नपाएको उनीहरुको बुझाई छ । निर्देशक तथा कलाकारले फिल्मको प्रमोसनमा पनि ध्यान नदिएको निर्माताहरुको गुनासो छ ।

अभिनेता रणवीरले पनि फिल्मको घाटालाई कम गर्न नयाँ कदम चाल्ने निर्णय लिएका छन् । फिल्मबाट रणवीरले अहिलेसम्म पूर्ण पारिश्रमिक पाइसकेका छैनन् । रणवीरले आफूले पाउनुपर्ने बाँकी पारिश्रमिक नलिने जनाएका छन् ।