मुम्बई(बलिउड लाइफ)– साउथ फिल्म ‘पुष्पा’ले बक्सअफिसमा आक्रामक व्यापार गरिरहेको छ । अल्लू अर्जुन स्टारर फिल्मले हालसम्म दुई सय ७५ करोड बढी कमाई गरिसकेको छ भने यसको मात्रा पनि बढ्दै गएको छ ।

फिल्मले सफलता पाएकोमा हालै फिल्म युनिटले एक कार्यक्रम गरेको थियो । जहाँ निर्देशक सुकुमार, अल्लू अर्जुन र अभिनेत्री रस्मिका मन्दानालगायतको उपस्थिति थियो । निर्देशक सुकुुमारले भावुक हुँदै फिल्म सफलताको श्रेय श्रीमति थबिता, निर्माता चिरञ्जीबी, कलाकारहरु र फिल्मका प्राविधिक सदस्यलाई दिए । उनले कार्यक्रममा लाइटमेन, सेट ब्वाइ, कष्ट्युम र प्रोडक्सन विभागका प्राविधिकलाई जनही १ लाख रुपैंयाँ दिने घोषणा गरे ।

अभिनेता अल्लूले निर्देशक सुकुमारको फिल्म ‘आर्या’ले आफ्नो करियरमा महत्वपूर्ण योगदान दिएको स्मरण गरे । अल्लूले सुकुमारको ‘आर्या’को सफलता पछि आफूले कार किनेको स्मरण गरे । उनले ‘आर्या २’मा पनि अभिनय गरेका छन् ।