काबुल– अफगानिस्तानको पंजशीर प्रान्तका लडाकु समूहले तालिबानसँग वार्ता गर्न तयार रहेको जनाएका छन् । बेलायती समाचार एजेन्सी रोयर्टसँग कुरा गर्दै पंजशीरका एक लडाकु नेताले तालिबानसँग वार्ताका लागि पंजशीरका विभिन्न समूहबीच छलफल भइरहेको बताएको बीबीसीले उल्लेख गरेको छ ।

बीबीसीका अनुसार रोयर्टसँग कुरा गर्दै बाल्ख प्रान्तका गभर्नर रहेका एक शक्तिशाली नेताका छोरा खालिद नूरले तालिबानसँग वार्ता गर्न पंजशीरका लडाकु समूहबीच छलफल चलिरहेको बताएका छन् । उनले तालिबानसँग आत्मशमपर्ण भने नगर्ने जनाएका छन् ।

तालिबानसँग वार्ता गर्न तयार रहेको बताउने खालिदले अन्य जिहादी समूहको प्रतिनिधित्व गर्न सक्छन् कि सक्दैनन् भन्ने प्रश्न भने रहेको बीबीसीले उल्लेख गरेको छ । पंजशीरमा रहेका जिहादी समूहहरुबीच आपसी मतभेदसमेत रहेको बताइन्छ ।

पूरा अफगानिस्तानमा कब्जा गरे पनि तालिबानले पंजशीरलाई नियन्त्रणमा लिन सकेको छैन । तर, तालिबानले पंजशीर उपत्यकालाई घेराउ भने गरेको छ ।

तालिबान प्रवक्ताले पनि पंजशीरका लडाकुहरुसँग वार्ता भइरहेको बताएका छन् । उनले वार्ता सफल हुने सम्भावना ६० प्रतिशत रहेको बताएका छन् । (एजेन्सी)