काठमाडौँ– सरकारले गरेको एक सर्वेक्षणले आधाभन्दा धेरै नेपालीमा कोरोना भाइरसको एन्टिबडी रहेको पुष्टि भएको छ । स्वास्थ्य तथा जनसंख्या मन्त्रालयले आइतबार एक विज्ञप्ति जारी गर्दै गत असार २१ गतेदेखि साउन ३० गतेसम्म गरिएको सर्वेक्षणमा ६८. ६ प्रतिशतमा कोरोना भाइरसको एन्टिबडी भएको पुष्टि भएको जनाएको छ । सर्वेक्षणमा ६ महिनाका बालकासमेत १३ हजार १६१ जनाको नुमना समावेश गरिएको मन्त्रालयले जनाएको छ ।

सर्वेक्षणको यो नतिजाअनुसार आधाभन्दा धेरै नेपालीहरु कोरोना संक्रमित भएर ठिक भइसकेको संकेत गरेको छ । कोरोना संक्रमित भएकाहरुमा कोरोनाविरुद्धको एन्टिबडी बन्ने गर्छ । मन्त्रालयका अनुसार हिमाल, पहाड र तराईँ तथा सबै उमेर समूह र लिंगमा समान रुपले एन्टिबडी देखिएको छ ।

मन्त्रालयले कोरोनाविरुद्धको एकमात्रा खोप लगाएका ९० प्रतिशतमा एन्टिबडी देखिएको छ । खोप लगाएकाहरुमा एन्टिबडी भेटिनु खोप प्रभावकारी रहेको बुझ्नुपर्ने मन्त्रालयले बताएको छ ।