काठमाडौँ– काठमाडौँ उपत्यकामा मंगलबारदेखि सार्वजनिक यातायात सञ्चालन भएका छन् ।

दुई महिनादेखिको निषेधाज्ञा थप खुकुलो बनाएसँगै मंगलबारदेखि सार्वजनिक यातायात जोरबिजोर प्रणालीमा सञ्चालन भएका हुन् ।

२५ सिटभन्दा बढी क्षमताका बस मात्र बिहान ६ देखि साँझ ७ बजेसम्म चल्न पाउनेछन् । आज पहिलो दिन न्यून संख्यामा मात्रै चलेका सार्वजनिक बसमा यात्रुको भने चाप देखिएको छ ।

यात्रुको भीडले खचाखच सार्वजनिक बसमा स्वास्थ्य सतर्कता भने अपनाएको पाइएको छैन । कारोना भाइरसको संक्रमण बढ्दै गएपछि सरकारले गत वैशाख १६ देखि निषेधाज्ञा जारी गरेको थियो ।

कोरोना संक्रमित घट्दै गए पनि जोखिम कायमै रहेको भन्दै काठमाडौँ उपत्यकाभित्रका प्रमुख जिल्ला अधिकारीहरूले स्वास्थ्य सुरक्षा मापदण्ड कडाइका साथ पालना गर्दै सार्वजनिक यातायात सञ्चालन गर्न दिने निर्णय गरेका थिए । साथै एक साता निषेधाज्ञा थप गरिएको थियो ।

यसअघिदेखि नै निजी सवारी साधन पनि जोर–बिजोर प्रणालीअनुसार सञ्चालन हुँदै आएका छन् । तर लामो दूरीका सवारी साधन सञ्चालनमा अझै रोक लगाइएको छ ।

सबै किसिमका पसलहरू बिहान ११ बजेदेखि बेलुकी ६ बजेसम्म खोल्न पाइने व्यवस्था गरिएको छ ।