मुम्बई– बलिउडको सबैभन्दा पुरानो परिवारमध्ये एक कपूर परिवारमा गत वर्ष एकै वर्ष दुईजनाको निधन भयो । त्यसमा एक ऋषि कपूर थिए र अर्का उनका सानो भाइ राजीव कपुर थिए ।

यी दुई दुःखलाई झेलिरहँदा यो परिवारमा एउटा अर्को नयाँ तनाव सुरु भएको छ । एबीपी लाइभमा प्रकाशित समाचारअनुसार यो तनाव राजीवको सम्पत्तिको हकलाई लिएर हो । किनकी कपूर परिवारका कोही पनि सदस्यलाई राजीवको सम्बन्धविच्छेदको कागजात कहाँ छ भन्ने कुराको जानकारी छैन ।

राजीवको गत फेब्रुअरी ९ मा हृदयघातका कारण निधन भएको थियो । जसको दुई महिना पछि उनका ठूलो दाई रणधीर कपूर र उनकी बहिनी रीमा जैन राजीवको सम्पत्तिमाथि हकदाबी गर्न बम्बई हाइ कोर्टमा अपिल गरेका थिए ।

तर अदालतले राजीवको सम्बन्धविच्छेदको कागजात ल्याउन आदेश दिएपछि उनीहरु त्यो कागजातको खोजीमा जुटेका छन् । कार्टको आदेशपछि रणधीरले आफूहरुसँग सम्बन्धविच्छेदको कागज नभएको बताएका छन् ।

राजीवले सन् २००१ मा आरती सभरवाल नामकी महिलासँग विवाह गरेका थिए र उनीहरुको सन् २००३ मा सम्बन्धविच्छेद भएको थियो ।

कपूर परिवारका वकिलले उनीहरुको सम्बन्धविच्छेद कुनै पारिवारिक अदालतमा भएको र त्यो अदालत कहाँ छ भन्ने खोजी भइरहेको दाबी गरेका छन् ।