इलाम – इलाममा करिब दुई करोड लागतमा कृषि बजार निमार्ण हुने भएको छ ।

इलाम नगरपालिका वडा नं. ७ स्थित सिंहवाहिनी खोस्लीमा निर्माण हुन लागेको कृषि बजार (सब्जी तथा पशुबजार) को सोमबार प्रदेश १ का भूमि व्यवस्था, कृषि तथा सहकारी मन्त्री राम रानाले शिलान्यास गरेका छन् ।

इलाम नगरपालिकाले निर्माण गर्न लागेको सो भवनको एक करोड ९९ लाख रुपैयाँको लागत रहेको छ । फलामको ट्रष्ट प्रयोग गरेर बनाइने भवनको छाना जस्ताको लगाइने र एक तलामा सब्जी तथा अर्को तलामा पशु बजार लगाइने नगरपालिकाले जनाएको छ ।

इलाम नगरपालिकाले कृषिलाई व्यवसायीकरण गर्दै लैजाने योजनाअनुसार कृषिलाई प्राथमिकता दिएको नगरप्रमुख महेश बस्नेतले बताए ।

स्वास्थ्यका दृष्टिकोणले पनि व्यवस्थित बजारको रुपमा भवन निर्माण गरिने नगरप्रमुख बस्नेतको भनाइ छ ।