एडिसन फोनोग्राम बनाउने काममा व्यस्त थिए । यसैबीच एउटा बिग्रिएको मेसिनबाट आइरहेको स्वरले उनलाई निकै डिस्टर्व भइरहेको थियो । उनले त्यो मेसिन ठीक पार्ने जिम्मा आफ्ना सहायकलाई दिए ।

दुई वर्षसम्म त्यस मेसिनमा काम गरिसकेपछि सहायक एडिसनसामु आएर भने— मिस्ट एडिसन, मैले तपाईंको हजारौँ डलर र आफ्नो जीवनको दुई वर्ष यही काममा गुमाएँ तर परिणाम शून्य रह्यो । मबाट काम हुन सकेन । त्यसैले म राजीनामा दिन चाहन्छु ।

सहायकले आफ्नो राजीनामा पत्र टेबुलमा राखिदिए र भने— कृपया मेरो राजीनामा स्वीकृत गरियोस् ।

एडिसनले केही नसोची त्यो पत्र उठाएर च्यातिदिए र भने— म तिम्रो राजीनामा अस्वीकार गर्छु ।

उनले सहायकलाई सम्झाए— जर्ज, मलाई विश्वास छ, हरेक ईश्वरले दिएका समस्याको समाधान पनि उसैसँग छ । हामीले त्यसको समाधान गर्न नसके पनि कुनै न कुनै दिन कसै न कसैबाट समाधान हुनेछ । त्यसैले जाऊ र पुनः कोसिस गर ।

साभार : ‘महान् व्यक्तिका प्रेरक प्रसङ्गहरु’ किताबबाट