छालामा उत्पन्न हुने समस्या मध्ये धेरैलाई सताउने समस्या हो, डन्डिफोर । डन्डिफोरले अनुहारको सुन्दरतामा कमी ल्याउनुका साथै छालासम्बन्धी अन्य विभिन्न समस्या पनि निम्त्याउने गर्छ । जसका कारण मानिसहरू डन्डिफोर आउन नदिन विभिन्न सावधानी अपनाइरहेका हुन्छन् । डन्डिफोरबाट बच्न सावधानी अपनाउँदा अपनाउँदै पनि कहिलेकाहीँ डन्डिफोर आउने गर्दछ ।

डण्डिफोरबाट छुटकारा कसरी ?

क) डन्डिफोरको समस्या हुने व्यक्तिले दिनमा तीन पटक अनुहार राम्रोसँग सफा गर्नु पर्छ । यदि अनुहार सफा भयो भने अनुहारका कोषहरूमा ऊर्जा पुग्छ ।

ख) डण्डिफोरको समस्याबाट बच्न आफ्नो छाला अनुकूलको फेसवास प्रयोग गर्नु पर्दछ । गुलाब, स्याउबाट बनेका प्राकृतिक फेसवासको प्रयोग गर्नु लाभदायक हुन्छ ।

ग) नियमित छाला सफा गर्दा अनुहारमा रहेका धुलोका कणलाई हटाउने काम गर्दछ । तर अनुहार सफा गर्ने नाममा बारम्बार सफा गर्ने वा अनुहारको छाला घोट्ने काम गर्नु हुँदैन । अन्यथा अनुहार फुस्रो हुनुका साथै अनुहारमा रातो डाबर आउने गर्दछ ।

घ) डण्डिफोर कम गर्न नियमित रूपमा पर्याप्त पानी पिउन महत्त्वपूर्ण हुन्छ । त्यसैले पर्याप्त मात्रामा पानी पिउने बानी बसाल्नुपर्छ ।

ङ) यदि डन्डिफोर आएको छ भने त्यसलाई घरीघरी हातले छुनुहुँदैन । हात फोहोर भएको खण्डमा संक्रमण बढाउने सम्भावना धेरै हुन्छ ।

च) डन्डिफोर आउने व्यक्तिले चिल्लो पिरो, अमिलो खाने कुराहरुबाट टाढै बस्नु उपयुक्त हुन्छ ।

छ) डन्डिफोर अस्वभाविक रुपमा बढे छाला विशेषज्ञलाई देखाई उपचार थाल्नु पर्दछ ।