सिराहा– सिराको धनगढीमाई नगरपालिका १२ स्थित कालापानीका स्थानीय वर्षौदेखि खानेपानी अभावमा बाँचिरहेका थिए । तर, बिहीबारदेखि घर-घरका धारामा खानेपानी आएपछि उनीहरू खुसी बनेका छन् ।

यसअघि उक्त क्षेत्रका ६० घर परिवार नजिकै रहेको सर्रे खोलाको पानी पिउँदै आएका थिए । धनगढीमाई नगरपालिकाको ३० लाख र समुदायको ३ लाख ३८ हजार गरी ३३ लाखको ३८ हजार लागतमा कालापानी खानेपानी आयोजना निर्माण सम्पन्न भएको हो ।

उक्त खानेपानी आयोजनाको उद्घाटन गर्दै नगरप्रमुख हरिनारायण चौधरीले मितव्ययिता ढंगले धारामा आएको शुद्ध पानी खान अनुरोध गरे । उनले बनेको संरचनालाई सबैले संरक्षण गर्न गर्नु पर्ने बताए ।

पानी ल्याउने झन्झट एवं समय पनि बचत हुने भएकाले बचत भएको समयलाई सदुपयोग गर्दै आर्थिक उपार्जनमा लगाउन सबैमा नगरप्रमुख चौधरीको सुझाव छ ।