काठमाडौँ– कोरोना संक्रमित कांग्रेस महामन्त्री पूर्णबहादुर खड्काको स्वास्थ्यमा सुधार आएको छ । खड्काले सामाजिक सञ्जाल फेसबुकमार्फत आफ्नो स्वास्थ्य सुधार भएको जानकारी दिएका छन् ।

कोरोना संक्रमित भएर घरमै आइसोलेशनमा बसेको र होमोप्याथिक र एलोप्याथिक औषधि सेवन गर्दा स्वास्थ्यमा समस्या आएपछि सशस्त्र प्रहरीको अस्पतालमा उपचार गराएको उनले जानकारी दिएका छन् ।

उनले भनेका छन्, ‘होम आइसोलेशनमा सामान्य अबस्थामा बसिरहेको अबस्थामा कोभिड संक्रमणले भेटेको पाँचौ दिनमा बिहान होमियोपेथि र एलोपेथि औषधि एकैपटक खाँदा रियाक्सन हुन गई अक्सिजन लेभल ९७ भए पनि पल्सरेट ५१ मा झरेको थियो ।’

उनले पल्स रेट घटेपछि प्रेसरमासमेत तलमाथि भएको र सशस्त्र प्रहरीको अस्पतालमा उपचार गराएको बताएका छन् ।

खड्काले कोरोनालाई सामान्य रुपमा लिन नहुने बताएका छन् ।