काठमाडौँ– नेकपा (एकीकृत समाजवादी)का अध्यक्ष माधवकुमार नेपालले आफूलाई दोस्रो तहका नेताहरुले धोका दिएको बताएका छन् । शनिबार ललितपुरमा पेशगत महासंघ बागमती प्रदेश समितिद्वारा आयोजित ललितपुर जिल्लास्तरीय भेला तथा प्रशिक्षण कार्यक्रममा अध्यक्ष नेपालले कलम चिन्ह भएको नेकपा एकीकृत पार्टी र नेकपा लोकतापन्त्रक पार्टी पनि दोस्रो पुस्ताले खोलेको दावी गरे ।

केपी ओलीको प्रवृतिबिरुद्ध कुनै नयाँ पार्टी गठन गरौं भन्दै दोस्रो पुस्ताका नेताहरुले दुई वटा पार्टी निर्वाचन आयोगमा दर्ता गरेको उनको भनाइ छ । उनले यसअघि नयाँ पार्टी खोलौ भन्ने नेताहरुले नै आफुहरुको पार्टीको बिरोध गरेको आरोप लगाए । अध्यक्ष नेपालले दोस्रो पुस्ता आफ्नो पार्टी आए आफू अध्यक्ष पद नै हस्तान्तरण गर्न तयार रहेको स्पष्ट पारे ।

नेकपा (एकीकृत समाजवादी) गठन पदका लागि नभएर बिचार र सिद्धान्तका लागि गठन भएको उनले बताए । उनले बिचार मिल्ने शक्तिहरुसँग सहकार्य गरेर अघि बढ्ने धारणा राखे । अहिले नै कुनै पार्टीसँग एकता नगर्ने र पार्टीको आधार बलियो बनाउने उनले बताए । फरक प्रसंगमा उनले अन्य धर्म लिएका व्यक्तिलाई पशुपति बिकास कोषको सदस्य सचिव बनाउन आफुले पहल गरेको भनेर गलत भ्रम फैलाएको उल्लेख गरे ।