काठमाडौँ– काठमाडौँ उपत्यकामा थप भएको निषेधाज्ञा शुक्रबारबाट थप कडाइ भएपछि दूधको ढुवानीमा समस्या आएको छ ।

जिल्ला प्रशासन कार्यालय काठमाडौँले रातिको ९ बजेदेखि बिहानको ९ बजेसम्म दूध ढुवानीका गाडी उपत्यका प्रवेश गरिसक्नुपर्ने बताएसँगै थप समस्या देखिएको जोरपाटी दुग्ध उत्पादन सरकारी संस्था काभ्रेका अध्यक्ष रबिन्द्र केसीले बताए ।

‘दूध संकलन केन्द्र वा दूध चिस्यान केन्द्रमा किसानहरुबाट दूध संकलन गर्दा बिहान ८ देखि ९ बज्छ, संकलित दूधलाई चिसो वा प्रशोधन गर्न २ घण्टा लाग्छ’ अध्यक्ष केसीले खबरहबसँग भने ‘तोकिएको समयमा उपत्यकाको नाका प्रवेश गर्न सकिदैन, त्यो अव्यवहारिक छ ।’

शुक्रवार साँगा, काभ्रेभञ्ज्याङ, जगाते, पनौतीलगायत चौकीहरुमा हजारौं लिटर दूध बोकेका गाडीहरु सिडियोको आदेश भन्दै डेढदेखि दुई घण्टासम्म होल्ड गराएको समेत उनले बताए ।

‘गत महिना प्रधानमन्त्रीले दूधको लोगो सार्वजनिक गर्दै दूध ढुवानीका साधनलाई एम्बुलेन्स सरह सविधा दिने नियम बनाएका थिए’ उनी भन्छन्, ‘तर एक महीना नबित्दै नियम कहाँ पुग्यो ?’

प्रधानमन्त्रीले भनेझैं दूध ढुवानीका लागि एम्बुलेन्स सरह सुविधा दिनुपर्ने उनको माग छ ।