काठमाडौँ– देशभर सामान्यदेखि पूर्ण बदली भई हल्कादेखि मध्यम वर्षा भइरहेको छ ।

जल तथा मौसम पूर्वानुमान महाशाखाका अनुसार देशका अधिकांश स्थानहरूमा मेघगर्जन, चट्याङ र हावाहुरीसहित वर्षा भइरहेको हो ।

बंगालको खाडीमा विकसित यास् नामक चक्रवात पश्चिमउत्तर–पश्चिम सर्ने क्रममा कमजोर भई बनेको न्यून चापीय क्षेत्रको प्रभावका कारण हावाहुरीसहित वर्षा भइरहेको महाशाखाले जनाएको छ ।

प्रदेश १, प्रदेश २, बाग्मती, गण्डकी र लुम्बिनी प्रदेशका केही स्थानहरूमा भारी /अति भारी वर्षा र उच्च बेगको हावाहुरीको सम्भावना छ । उच्च हिमाली/पहाडी भूभागका धेरै स्थानहरुमा हल्कादेखि मध्यम हिमपात/वर्षा र गण्डकी प्रदेशका केही स्थानहरूमा, बागमती प्रदेश, प्रदेश १ तथा सुदूरपश्चिम प्रदेशका उच्च हिमाली/पहाडी भूभागका १/२ स्थानमा भारी हिमपातको सम्भावना छ ।