मुम्बई– बलिउड अभिनेता जिम्मी शेरगिल कोरोना प्रोटोकल उल्लंघनको आरोपमा पक्राउ परेका छन् । प्रहरीले जिम्मीसहित ४ जनालाई पक्राउ गरेको हो । प्रहरीले उनलाई पञ्जाबकाे लुधियानाबाट पक्राउ गरेकाे हाे ।

उनलाई एकदिनअघि प्रोटोकल उल्लंघनको आरोपमा प्रहरीले जरिवाना तिराएको थियो । यसपछि पनि फेरी उनी रात्रीकालिन कर्फ्युमा निस्किएका थिए ।

दैनिक भास्करमा प्रकाशित समाचारअनुसार पछिल्लो तीन दिनदेखि जिम्मीको टिम आर्य स्कुलमा एक पञ्जाबी फिल्मको सुटिङ गरिरहेको थियो । फिल्म युनिटले स्कुलको भवनलाई सेशन कोर्टको सेटमा परिणत गरेको थियो ।

प्रहरी अधिकारी मनिन्दर कौरले सुटिङस्थलमा भौतिक दुरी पालना नगरिएको सूचना सोमबार आएको बताए । ‘कसैले मास्क पनि नलगाएको सूचना पाएपछि एसीपी सेन्ट्रल वरियाम सिंहको नेतृत्वमा पुगेको प्रहरी टोलीले उनीहरुलाई दुई चिट काटेको थियो’, मनिन्दरले भनेका छन् ।

प्रहरीले चिट काटे पनि फिल्म युनिटले पुनः नियमको उल्लंघन गरेको थियो । मंगबार बेलुका प्रहरीले नाइट कर्फ्युका बाबजुद पनि सुटिङ भइरहेको र सेटमा १ सय ५० व्यक्ति उपस्थित भएको सूचना पाएको थियो ।

यो सूचना पाएपछि प्रहरीले जिम्मीसहित ४ लाई पक्राउ गरेको हो । सबैका विरुद्ध सरकारी आदेशको उल्लंघन, ३ महामारी एक्ट र अन्य धारा अनुसार मुद्धा दर्ता गरिएको छ ।