काठमाडौँ — मेलम्चीको खानेपानी काठमाडौँ उपत्यकाका विभिन्न क्षेत्रमा वितरण शुरु गरिएको छ ।

काठमाडौं उपत्यका खानेपानी लिमिटेड (केयूकेएल)ले मेलम्चीको खानेपानी विभिन्न ठाउँका ट्यांकीहरु भर्दै पानी वितरण गर्ने काम आइतबार शुरु गरेको हो ।

आयोजनाको महाँकाल चौरमा भण्डारण गरेर राखिएको पानी दिउँसो ठीक २ बजे काठमाडौँ उपत्यका खानेपानी लिमिटेड (केयूकेल) का निर्देशक मिलन शाक्य, काठमाडौँ खानेपानी व्यवस्थापन बोर्डका कार्यकारी निर्देशक संजीव विक्रम राणा, महाँकाल चौर शाखा प्रमुख उमेश मरहट्टा र खानेपानी सञ्चालन विभाग प्रमुख सतिश दत्तले एकैसाथ चाबी खोलेर वितरण गरेका हुन् ।

केयूकेएलले आइतबार काठमाडौंको महाँकाल लगायत विभिन्न क्षेत्रमा पानी वितरण सुरु गरेको जानकारी दिएको हो । केयूकेएलका प्रवक्ता राईले चाबहिलको महाँकाल चौरको ट्यांकीबाट दुई बजेदेखि पानी वितरण सुरु गरेको बताए ।

‘मेलम्चीको खानेपानी वितरण गरिरहेका छौं । चाबहिलको महाँकाल चौरको ट्यांकीबाट दिउँसो २ बजेदेखि वितरण थालिएको हो, पानी उपभोक्ताको धारा–धारामा झरिसकेको छ ।’

हेरौँ भिडियो

देवकोटा सडक, बत्तीसपुतली, जयबागेश्वरी, चावहिल, कुटुबहाल, सिफल, कालोपुल, एअरपोर्ट हाइट, धनवन्तरी मार्गलगायत क्षेत्रका धारामा पानी आएको काठमाडौँ केयुकेएलले जनाएको छ ।

हाल पुराना पानी पोखरीहरूमा मेलम्चीको पानी भरी पुरानै पाइपलाइन र धारामा दिइने र आयोजना कार्यान्वयन निर्देशनालयबाट बिच्छाइएको नयाँ पाइपलाइनमा परीक्षण गर्दै लैजाने लिमिटेडको योजना छ ।

उपत्यकामा पहिलोपटक आइतबारदेखि पानी वितरण गरिएको हो । केयूकेएलको अहिले परीक्षणका लागि पुरानै प्रणालीबाट पानी वितरण गरेको जनाएको छ ।

सुरुमा विभिन्न स्थानमा रहेका रिजर्भ ट्यांकीमा पानी जम्मा गरी वितरण प्रक्रिया थालेको केयूकेलले जानकारी दिएको छ ।

परीक्षणअवधिमा उपत्यकामा रहेका रिजर्भ ट्यांकीहरुको परीक्षण सम्पन्न भएपछि नयाँ प्रणालीबाटै पानी वितरणको तयारी भएको खानेपानी मन्त्रालयका सचिव माधव बेल्वासेले जानकारी दिए।

मेलम्चीको पानी २६ किलोमिटर सुरुङमार्गमार्फत गत फागुन २२ गते सुन्दरीजलको पानी प्रशोधन केन्द्रमा खसालिएको थियो । आर्थिक वर्ष २०५५/५६ देखि मेलम्ची परियोजना सुरु भएको थियो ।