बुटवल- लुम्बिनी प्रदेशको राजधानी देउखुरीमा जग्गा रोक्का फुकुवा भएको छ । शुक्रबार बसेको प्रदेश मन्त्रिपरिषदको बैठकले देउखुरीमा जग्गा रोक्का फुकुवा गर्ने निर्णय गरेको हो ।

लुम्बिनी प्रदेशको स्थायी राजधानी तोकिएपछि हुनसक्ने जग्गा किनबेचको कारोबार र भाउ वृद्धि रोक्न प्रदेश सरकारले रोक्का गरेको थियो । रोक्का फुकुवा भने पनि बेचबिखन गर्न भने पाइने छैन ।

लुम्बिनी प्रदेश सरकारका प्रवक्ता, भौतिक पूर्वाधार मन्त्री बैजनाथ चौधरीका अनुसार प्रचलित कानूनबमोजिम पैतृक सम्पत्ति अशंवण्डा भएकोमा अदालतको पत्रअनुसार अंशियारको नाममा सम्पत्ति कायम गर्ने गरी कित्ताकाट तथा लिखित पारित गर्न सकिने गरी फुकुवा भएको हो ।

मन्त्रिपरिषद बैठकले आगामी वर्ष प्रदेशमा ६ दिन सार्वजनिक बिदा थप्ने निर्णय गरेको छ । पर्वहरूको महत्त्वलाई ध्यान दिँदै ६ दिन बिदा दिने निर्णय गरेको मन्त्री चौधरीले बताए । उनका अनुसार बकर इद, कृष्णजन्माष्टमी, भूमी पूजा (रोल्पा–रुकुम), बर्का आइतबारी (तराईका ६ जिल्ला), रमजाम, भगवती जात्रा (पाल्पा) मा बिदा दिने निर्णय भएको छ ।

प्रदेश सरकारले लुम्बिनी प्रदेशसभाको बैठक चैत १८ गते आह्वान गर्न प्रदेश प्रमुख धर्मनाथ यादव समक्ष प्रस्ताव पठाउने निर्णय गरेको छ । बैठकले प्रदेश आर्थिक कार्यविधि ऐन, ०७४ संशोधन र एकीकरण सम्बन्धनमा व्यवस्था गर्न बनेको विधेयकको मस्यौदा तयार गरिएको अवधारणापत्रमा सैद्धान्तिक स्वीकृति प्रदान गरेको छ ।