काठमाडौँ- राष्ट्रियताका लागि खरा व्यक्तिका रुपमा दरिए पनि भोल्तेयर सौन्दर्य प्रेमी थिए । उनी व्यङ्ग्यविनोदमा पनि खप्पिस थिए । पादरीहरुले गर्ने घृणित व्यवहार र अहमताको कारण उनी तिनीहरुलाई कहिल्यै पनि सम्मान गर्न चाहँदैनथे ।

८४ वर्षको उमेरमा पुगेपछि र उनी संसारबाट बिदा लिन ओछ्यानमा परेका थिए । त्यही क्रममा उनलाई धर्मोपदेश दिन एक पादरी आए ।

पादरीलाई आफूछेउ देखेर भोल्तेयरले सोधे— तपाईं कहाँबाट आउनुभएको ?

पादरीले आफूलाई धर्मावतारको रुप सम्झेर बडो गर्वसाथ जवाफ दिए— म ईश्वरको दरबारबाट आएको हुँ ।

ए ! त्यसो भए ईश्वरका दरबारबाट आउने मानिससँग त त्यहाँबाट पठाएको प्रमाणपत्र पनि होला ? खोई त्यो निकाल्नुहोस् त हेरौँ ।

भोल्तेयरको प्रश्नको कुनै जवाफ थिएन पादरीसँग ।

साभार : ‘विश्वका उत्कृष्ट प्रेरक प्रसङ्गहरु’ पुस्तकबाट