झापा– संघीय सरकारका भौतिक पूर्वाधार तथा यातायात मन्त्री वसन्त नेम्वाङ्ले राजनीतिक अस्थिरताका बावजुद देश औद्योगीक क्रान्ति तर्फ अघि बढेको बताएका छन् ।

झापाको कमल ७ को झर्काहमा चाईना नेपाल फ्रेण्डशिप ईण्ड्रियल पार्कको शिलान्यास समारोहमा उनले प्रधानमन्त्री केपी शर्मा ओलीको अगुवाईकै कारण यो सम्भव भएको पनि दावी गरे ।

उनले वर्तमान सरकारको ३ वर्षको अवधिमा ९१५ ओटा मोटरेवल पुल निर्माण भएको दावी गर्दै यो परिमाणमा कुनै पनि सरकारको पालामा नभएको जिकिर गरे ।

हुलाकी राजमार्गको पूर्वी खण्डको ४८ किलोमिटर खण्ड पूरा हुने भन्दै उनले मदन भण्डारी राजमार्गको पूर्वी खण्ड निर्माणका लागि ठेक्का प्रकृया अघि बढेको जानकारी दिए ।

धरानदेखि दमकको बेलडाँगीसम्मको ५३ किलोमिटर ठेक्काको प्रकृयामा रहेको र बेलडाँगीदेखि शान्तिनगरसम्मको ७६ किलोमिटर निर्माणको प्रकृया पनि अघि बढाईने दावी गरे । पूर्व पश्चिम रेल मार्ग निर्माणको काम नरोकिने दावी गर्दै यसको काम अघि बढाईने उनले बताए ।

कम्युनिस्ट आन्दालनको नेतृत्व ओलीबाट मात्रै : भट्ट

कार्यक्रममा उद्योग वाणिज्य तथा आपूर्ती मन्त्री लेखराज भट्टले नेपालको कम्युनिष्ट आन्दोलनको नेतृत्व केपी शर्मा ओलीबाट मात्र सम्भव रहेको बताएका छन् । सोही कार्यक्रमलाई संवोधन गर्दै नेता भट्टले अहिले सडकमा उभिएर हामी यता छौं भन्नेहरुबाट नेपालको राजनीतिक र आर्थिक नेतृत्व सम्भव नभएको पनि तर्क गरे ।

प्रचण्ड–नेपाल समुहलाई लक्षित गर्दै मन्त्री भट्टले त्यहाँ रहेका तीन प्रधानमन्त्रीले कहिल्यै नदेखेको लिपुलेक र कालापानी ओलीले मात्र देखेको भन्दै साँचो राष्ट्रवादको सँग रहेको छ यसबाट पनि प्रष्ट हुने तर्क गरे ।