मुम्बई – बलिउडमा आध्यात्मिक गुरु ओशो रजनीशमाथि फिल्म बन्ने चर्चा चलेको धेरै भयो । ओशोको जीवनीमा फिल्म बनाउन निर्देशक शकुन बत्रा तयारी गरिरहेका थिए । जुन फिल्ममा लगानी गर्न निर्माता करण जोहर उत्साहित थिए ।

फिल्मका लागि शकुन र करणले आमिर खान र आलिया भट्टलाई अभिनय गराउने चर्चा पनि थियो । तर भित्रभित्रै योजना बने पनि आधिकारिक घोषणा नहुँदा यस्तै कथामा भोजपुरी सुपरस्टार रवि किशनले बाजी मारेका छन् ।

आमिर अघि रवि किशन अब वेलजी भाई गाला निर्मित फिल्म ‘सिक्रेट्स अफ लव’मा ओशो रजनीशको भूमिकामा दर्शकमाझ आउदैछन् । ‘विगत ३० वर्षदेखि म ओशोको सन्यासी छु र म उनको कथा आम मानिसमाझ चाँडै पुर्‍याउन चाहन्थेँ, निकै लामो समयसम्मको सोच विचारपछि ओशोको कथालाई फिल्मका रुपमा आम मानिसमाझ पुर्‍याउन सकिन्छ जस्तो लाग्यो’, वेलजीले भनेका छन्, ‘मैले ओशोको कैयौं प्रवचन सुनें । उनले मेडिटेसनका बारेमा धेरै कुरा बताएका छन् ।

ओशोका हरेक कुरालाई मैले भित्री रुपमा बुझेको छु । त्यहीकारण फिल्म बनाउन मलाई कुनै समस्या भएन । मेरो बुझाईमा ओशो यो शताब्दीकै राम्रा मान्छे हुन् । त्यहीकारण यो शताब्दीका मान्छेहरुले उनको बारेमा बुझ्न आवश्यक छ ।’

फिल्ममा ओशोका तीन फरक चरित्रलाई प्रस्तुत गरिएको छ । त्यहीकारण फिल्ममा यी चरित्रका लागि वेलजीले जयेश कपूर, विवेक मिश्रा र रवि किशनले अभिनय गरेका छन् । ‘जब ओशो रजनीश अमेरिका गए, त्यो बेला उनलाई विष खुवाइएको थियो । त्यो भूमिकामा रवि किशन देखिनेछन् । रविलाई अनुबन्ध गर्नुअघि हामीले केही अभिनेताको लुक टेस्ट गरेका थियौं । तर रवि भन्दा उपयुक्र्त कोही देखिएनन् ।’ वेलजीले भनेका छन् ।

निर्माताहरु गत वर्ष नै यो फिल्मलाई रिलिज गर्न चाहन्थे । तर कोभिड महामारी पछिको लडकाउनका कारण उनीहरुले आफ्नो योजनालाई परिवर्तन गरे । अब यो फिल्म यसै वर्षको अप्रिल र मेको बीचमा रिलिज हुनेछ । निर्माताका अनुसार कपिराइटका कारण फिल्ममा ओशोको नाम राखिएको छैन । फिल्मको छायांकन काशी, गुजरात, गोवा, जबलपुर र मुम्बईमा गरिएको छ ।